Kamal-e-zabt ko khud bhi to aazmaon gi
mein apne hath se us ki dulhan sajaongi
supard kar ke usey chandni ke hathon mein
mein apne ghar ke andheron ko lot jaongi
badan ki karab ko wo bhi na samjh paye ga
mein dil mein roeongi , aankhon mein muskuraongi
wo kya gaya rafaqat ke sare lutf gaye
mein kis se rooth sakoon gi, kise manao`n gi
ab us ka fun to kisi aur se hua mansoob
mein kis ki nazam akele mein gaongi
wo ek rishta benaam bhi nahin lekin
mein ab bhi us ke isharon par sar jhukaongi
bichha diya tha gulabon ke sath wajood apna
wo so ke uthe to khwabon ki rakh uthaongi
samaeton mein ghane janglon ki sansen hain
mein ab bhi teri awaz sun na paongi
jawaz dhoondh raha tha nayi mohabbat ka
wo keh raha tha mein us ko bhool jaon gi