Us se mein aksar kehta tha
jana`n ! apni gari badlo
tum par ye chhoti sheerad bilkul suit nahin karti hai
dekho is ke pahye dekho
dekho dekho ye dashboard
kitna halka , kitna sasta
wese bhi tum sach poochho to ye jo angothi mein diamond hai
ye bhi is se mehanga hoga
is mein aesi do, do care`n aa sakti hain
us se mein aksar kehta tha
yaar tum apni gari badlo
jare ane wale hain aur heater kaam nahin karta hai
ye A/C bhi theek nahin hai tum ko lu bhi lag sakti hai
aur ye dekho
itni achhi composition aur boseeda sound system
meri aqal se bahir hai
mien to public transport pe aa jata hoon
bachpan se is ka aadi hoon
lekin tum ye kese, kiyonkar, itni chhoti gari toba
meri aqal se bahir hai
us se mein aksar kehta tha
yar ! tum apni gari badlo
ik din wo zich ho kar boli
"jane kya hai kuch arse se
jab se tum jeevan mein aye
chhoti gari,chhoti cheezen
do kamre ke chhote ghar aur chhota angan
chhoti moti hansti dunya, chhoti galiyan
chhoti basti
nanhe munhe mehke khuwab
aur chhoti chhoti khushiyan
mujh ko ab achhi lagti hain
jane kya hai lekin sab kuch chhoti chhoti khuwahish ban kar
mujh mein raqs kiya karta hai"
mein nadan tha ye samjh wo meri ghurbat mein asani se reh le gi
phir kuch urte lamhe aye
collage ke do saal yun guzre jese sans guzar jati hai
do saal mein mosam badle fashion aur se aur hua aur
socho`n mein tabdeeli ayi
hum chhote se bare hue aur
jeene ko pehle se barh kar mushkil paya
us ki har chhoti khuwahish ka qad nikla aur
us ki nanhi socho`n ne bhi karwat badli
ik din us ne apne ghar ke sari chhoti chhoti cheezen
apne mali ke chhote bache ko de di`n
chhoti galiyan, chhote aangan, chhoti basti
ye sab to wese bhi us ko ik chhote ghar mein hi mill sakta tha
us ne chhoti gari badli
turk kiye wo sare dost
sab rishte aur sare sathi
jo chhote the
aur shayed un sab chhoto`n mein
mein sab se zyada chhota tha
us se mein khud hi kehta tha
yaar ! tum apni gari badlo.......................