Ye dil, ye pagal dil mera kiyon bujh gaya awargi

is dasht mein ik shehar tha wo kya hua awargi

kal shab mujhe beshakal ki awaz ne chonka diya

mein ne kaha tu kon hai us ne kaha awargi

logon bhala is shehar mein kese jiyen ge hum jahan

ho jurm tanha sochna lekin saza awargi

ye dard ki tanhaiyan, ye dasht ka veeran safar

hum log to ukta gaye apni suna ke awargi

ik ajnabi jhonke ne jab poochha mere gham ka sabab

sehra ki bheegi ret par mein ne likha awargi

is simat vehshi khuahishon ki zad mein peman-e-wafa

is simat lehron ka dhamak, kacha ghara,awargi

kal raat tanha chand ko dekha mein ne khuwab mein

mohsin mujhe raas aa gai shayed awargi